أغنية \ حبيتك و انا ساكتة \ شعر \ جمال الشرقاوى \

أغنية \ حبيتك و انا ساكتة \
شعر \ جمال الشرقاوى \

حبيتك و انا ساكتة
و اتمنى يوم تجينى
مهما اكونلك عاشقة
مهما تكون نور عينى
لو جيت هتقل عليك
هتقل و انا روحى فيك
لا هقولك أنا مغرمة
و لا طايرة بيك ف السما
لا هقول خدنى الحنين
و انا رايقة انا زى م انا
حبيتك و انا ساكتة
بضحك و لا ابينلك
يوم لمَّا تقرب منى
و ابكى لمَّا تقسى
تحاول تبعد عنى
رغم انى بفرح بيك
أنا بشكى منك ليك
خايف من إيه محتار
خايفة من إيه خطاويك
لا هقولك أنا مغرمة
و لا طايرة بيك ف السما
لا هقول خدنى الحنين
و انا رايقة انا زى م انا
حبيتك و انا ساكتة
إتقدم كون جريء
دافع عن حبك ليَّه
كسَّر أى حواجز
ف العالم من حواليَّه
ساعتها بروحى و قلبى
من غير ندم اشتريك
أقولك إنى بحبك
دايبة ف سحر عنيك
و اقولك أنا مغرمة
طايرة بيك ف السما
و اقول خدنى الحنين
و انا رايقة انا زى م انا

كتبت هذه الأغنية فى القاهرة يناير \ الأربعاء
6 \ 1 \ 1999م الموافق 18 رمضان الساعة 8 مساء \ جمال الشرقاوى
صحفى \ وكالة انباء مصر

دائما بين حروفك اجد روحا تتمزج بما بنا من وجدان
وشعور يخرج لنا بروعه البيان
ولكم تمنيت ان لا تنتهى بى الكلمات
فلا يسعنى غير قول الصمت فى حرم الجمال جمال
فدمت بكل تميز وابداع